ქართული ღვინის დებიუტი Prowine Sao Paulo 2024-ზე
- tboba magazine
- Nov 13, 2024
- 1 min read
Updated: Nov 18, 2024
Prowine Sao Paulo 2024, რომელიც 22-24 ოქტომბერს გაიმართა, უნიკალური შესაძლებლობა იყო ქართული ღვინის წარმომადგენლებისთვის, წარდგენილიყვნენ ლათინოამერიკულ ბაზარზე. გამოფენა ცნობილია თავისი ენერგიული ატმოსფეროთი და აერთიანებს მეღვინეებს, იმპორტიორებს, სომელიეებსა და ღვინის მოყვარულებს მსოფლიოს სხვადასხვა კუთხიდან, რათა აღმოაჩინონ უნიკალური ტერუარები და დაამყარონ კონტაქტი ღვინის ინდუსტრიის წამყვან პროფესიონალებთან.
წელს 500-ზე მეტ მონაწილესთან ერთად, კომპანია Loco por Vinos დახმარებით საქართველო პირველად წარსდგა გამოფენაზე, სადაც ქართული კუთხის მოწყობითა და განსაკუთრებული მასტერკლასებით გააცნეს ქართული 8000 წლიანი ღვინის ტრადიცია. „ჩვენ 2023 წელს საქართველოში ჩამოსვლისთანავე დავიწყეთ სამხრეთ ამერიკისთვის ქართული ღვინის მდიდარი ისტორიის გაზიარება და დიდი პატივი იყო, რომ Prowine Sao Paulo-ზე ქართული ღვინო პირველად წარგვედგინა” – Loco por Vino.
ღონისძიებაში მონაწილეობა ქართველი მეღვინეებისათვის მნიშვნელოვანი შესაძლებლობაა ბრაზილიაში ღვინის სფეროში მნიშვნელოვანი კონტაქტების დამყარების, დისტიბუციის არხების შექმნისთვის და ცნობადობის გაზრდისთვის. განსაკუთრებული დაინტერესება სწორედ ქვევრის მეთოდით დამზადებული ღვინოების გარშემო შეინიშნებოდა.
„Prowine Sao Paulo 2024 ძალიან საინტერესო გამოფენა იყო, რადგან დავინახეთ ქართული ღვინის მიმართ მზარდი ინტერესი. სამხრეთ ამერიკაში ღვინის მომხმარებლების ზრდა ცხადყოფს, რომ ეს ბაზარი ღიაა ინოვაციებისთვის და სტრატეგიულ ბაზარს წარმოადგენს ახალი ტენდენციებისთვის. ვფიქრობ, სწორი მარკეტინგული აქტივობებით და კომერციული შეთავაზების მიღწევით საქართველოს დიდი პოტენციალი აქვს ამ ბაზარზე“ - თეკო ტაბატაძე, შატო მუხრანის მარკეტინგის ხელმძღვანელი.
„ღონისძიების აღმოჩენა ნამდვილად ქართული ღვინო იყო“ - აღნიშნავენ გამოფენის ორგანიზატორები. ღვინის პროფესიონალებმა კი აღფრთოვანებით შეაფასეს ქართული ღვინოების უნიკალური თვისებები, რომლებიც განსაკუთრებულ ადგილს იკავებს გლობალურ ასპარეზზე.
216 მილიონზე მეტი მოსახლეობით და პრემიალურ ღვინოებზე მზარდი ინტერესით, ბრაზილია პერსპექტიულ ბაზარს წარმოადგენს ღვინის მწარმოებლებისთვის. არგენტინისა და ჩილეს ღვინოების მიმართ გაჯერებული ბაზრის ფონზე, ბრაზილიაში იმპორტიორები აქტიურად ეძებენ ახალ და ავთენტურ ღვინოებს, რაც ქართულ ღვინოს - განსაკუთრებით ქვევრში დამზადებული - პოზიტიურ მოლოდინს უქმნის ბრაზილიელ ღვინის მოყვარულებს.
Comments