ფერმენტი

ფერმენტი - ფერმენტირებული პროდუქტების უნიკალური გემოებით ინსპირირებული რეზი ცეცხლაძის ახალი შემოქმედებაა, რომელიც ავთენტური ღვინის გასტრო ბარია. ეს არის ადგილი, სადაც ახალ გემოებს აღმოაჩენ.

ლოკაცია სპეციალურად არის მათთვის, ვინც ეძებს თავგადასავლებს - ღვინის გასტრო ბარი სოლოლაკში მდებარეობს, გუდიაშვილის მოედანთან და არა კონკრეტულად მოედანზე, რაც ცოტათი აძნელებს მის პოვნას, თუმცა, როგორც რეზი აღნიშნავს, ესეც იდეის ნაწილია.

ბუტიკური ტიპის ღვინის ბარში შეგიძლიათ ის ფერმენტირებული სასმელი დააგემოვნოთ, რომლის ხასიათზეც იქნებით: ღვინო, სიდრი, ლუდი, კომბუჩა, საკე, ბაიჯუ, სოჯუ და ყურძნის ბაზაზე დამზადებული სპირტიანი სასმელები.

ფერმენტში მთავარი ყურადღება ნატურალურ ღვინოებს ექცევა, „ნატურალურ ღვინოებს რაღაცნაირად უფრო აქვთ ავთენტურობა. ამ ხასიათის პოვნა დაავადებულ ღვინოშიც შეიძლება, ხანდახან შეიძლება ოდნავ მომატებულმა მქროლავმა კერძის გემო უფრო საინტერესო გახადოს“ - რეზი ცეცხლაძე.

ქართულ თუ საერთაშორისო ფერმენტირებულ სასმელებს შეგიძლიათ კერძი სეზონური მენიუდან შეუხამოთ. ყოველ პარასკევს კი მოწვეული შეფის მიერ დამზადებული ავთენტური კერძების დაგემოვნების საშუალება გექნებათ.

28 სექტემბერს კი ფერმერტში, ცნობილი შეფი ლია დეიდა იმერულ გასტრონომიაში გამოგზაურებთ. გემრიელი თავგადასავალი კი პედრო ხიმენესით, იგივე ივლიტათი და ფრანგული ნამცხვრის მარჯოლეინის შეხამებით შეგიძლიათ დააგვირგვინოთ.

ფერმენტში მასპინძელი თავად რეზია, რაც კიდევ უფრო საინტერესოს ხდის აქ სტუმრობას.