საოჯახო მარანი - Pongino wine

როგორც ქართველების უმრავლესობისთვის, ღვინო გულნარა რომანიძისთვისაც მჭიდროდ არის დაკავშირებული ბავშვობის მოგონებებთან. თბილისში ცხოვრების მიუხედავად, ყოველ შაბათ-კვირას ხაშმს სტუმრობდა და ბუნებასთან კავშირს არ წყვეტდა. მთავარი გადაწყვეტილება 2017 წელს მიიღეს, როცა ავიაციას მეღვინეობა არჩიეს და ვენახი გააშენეს.

საბოლოოდ, ყველაფრის ძირფესვიანად შესწავლა დაიწყეს, რაც არ იყო მარტივი გზა. განსაკუთრებით იმ პერიოდში, როცა თანამედროვე ქართული მეღვინეობის ინდუსტრია ჩამოყალიბების ეტაპზე იყო.

T: როგორ განვითარდა თქვენი მარნის ისტორია?

ერთი ეტაპის დასასრული იყო, როცა ღვინო ბოთლში ჩამოვასხით, თუმცა აი მანდ დაიწყო რეალურად ყველაფერი. როგორ უნდა შეგვეთავაზებინა მომხმარებლებისთვის, როგორ უნდა წარმედგინა,  რას იტყოდნენ, მოეწონებოდათ თუ არა. როდესაც სხვადასხვა ობიექტებზე დავიწყეთ შესვლა და სხვების აზრს ვისმენდით, თუ როგორ მოსწონდათ ჩვენი ღვინო, ძალიან დიდი სტიმული იყო და ნიშანი, რომ სწორ გზაზე ვიყავით და უნდა გაგვეგრძელებინა.

T: როგორ შეარჩიეთ სახელი?

დიდი დრო დავუთმეთ სახელის შერჩევას. პონგინო სულხან-საბას ლექსიკონიდან არის აღებული და ნიშნავს სადაფის ქვას, რაც პირველი საჩუქარი იყო ჩემი ქმრისგან და დღემდე მარანში ვინახავ. მართლაც ჩვენს სიყვარულზე არის აგებული ჩვენი ღვინის მარანი. სახელიც აქედან წამოვიდა, კარგად ჟღერს, მარტივად დასამახსოვრებელია. ვიგრძენი, რომ ეს სახელი უნდა დაგვერქმია, გავრისკეთ და გაამართლა.

T: რა ტიპის ღვინოებს აწარმოებთ?

ჩვენ გვაქვს ხაშმის საფერავი, რომელიც ჩვენი ძირითადი ხაზია, 2019 წელს კი, მაღალი მოთხოვნის გამო, დავამატეთ ქისი და ასევე მუსკატის როზე.

აღსანიშნავია, რომ „ხაშმის საფერავი 2017-მა“ წითელი ღვინის მსოფლიო კონკურსზე ვერცხლის მედალი აიღო და სხვადასხვა კონკურსებზეც სომელიეს რჩეული ღვინოა.

T: რა ხდის თქვენს მარანს გამორჩეულს?

ჩემი შვილები ამ სტატიას, რომ წაიკითხავენ, კიდევ ერთხელ მეტყვიან, რომ ღვინო ჩვენზე მეტად გიყვარსო. პონგინო ვაინსი ჩემი და ჩემი მეუღლის მესამე შვილია და, შესაბამისად, ღვინო ჩემი ცხოვრებაა.

როდესაც ხაშმში ვმასპინძლობთ სტუმრებს, ვუყვებით ჩვენი ოჯახის ისტორიას და ძალიან დიდ ემოციებს ვგრძნობთ მათგან. სტუმრის მიღება ცალკე ხელოვნებაა, აქ მხოლოდ ღვინო აღარ არის. აქ უკვე ქვეყნის კულტურას და ტრადიციას აცნობ.

T: რა არის თქვენი სამომავლო გეგმები?

სამომავლო გეგმებში ხარისხის გაუმჯობესებაა მხოლოდ, რაოდენობის გაზრდას არ ვგეგმავთ. ჩვენ ყოველწლიურად მოლოდინში ვართ, დიდი მარნებისგან განსხვავებით ძალიან ცოცხალ პროცესში ვართ. კეთებასთან ერთად მოდის ყველაფერი და არ უნდა გაჩერდე. ძალიან დიდი სტიმულია ოჯახთან ერთად ამ საქმის კეთება და ჩემი მეუღლის მხარდაჭერა, რომლის გარეშეც ამ ყველაფრის განხორციელება შეუძლებელი იქნებოდა.