მეღვინეობა ორკოლი ჩეხეთის ბაზარზე შევიდა

მეღვინეობა ორკოლი ორი მეგობრის, გიორგი გეგელიას და ბექა გახარიას მიერ დაარსებულია, რომელიც გასცდა ქვეყნის ფარგლებს და ჩეხეთში გააცნობს ღვინის მოყვარულებს ქართულ ღვინოს.

როგორ შეიქმნა მეღვინეობა, რას ნიშნავს ორკოლი და რა სამომავლო გეგმები აქვს კომპანიას, ამის შესახებ თბობა გიორგი გეგელიას ესაუბრა.

T: როგორ დაიწყო ორკოლის ამბავი?

ჩვენი პირველი რთველი 2018 წელს იყო. რადგანაც წარმოშობით მე და ბექა ორივე დასავლეთიდან ვართ, გადავწყვიტეთ, რომ ადგილობრივი ჯიშები გაგვეხადა პოპულარული და დავიწყეთ ძალიან მცირე რაოდენობით კრახუნას, ციცქას, ცოლიკოურის და ოცხანური საფერეს ჯიშებიდან ღვინის დაყენება.  

ჩვენს შედეგზე პასუხი თვითონ ადგილობრივმა ბაზარმა გაგვცა. ჩვენს ღვინოებს საკმაოდ კარგი შეფასება მოჰყვა როგორც ლაბორატორიულად, ასევე მომხმარებლის მხრიდან. ამან სტიმული მოგვცა, რომ შემდეგ წელს კიდევ დაგვეყენებინა ღვინო.

T: რას ნიშნავს ორკოლი და როგორია თქვენი ბრენდინგი?

ორკოლი მეგრული სიტყვაა და საღვინე დოქს აღნიშნავს. ეს დოქი ეტიკეტზე არის დატანილი და მის ყელში ჩასმულია მზე - ღმერთის და სიცოცხლის სიმბოლო, შემდეგ თემატურად მოდის მეგობრობა, რაც ჩვენთვის ძალზედ ძვირფასია - მეორე, მესამე ადამიანთან ერთად ვაზის კრეფა და ღვინის დაწურვა ნდობისა და პატივისცემის დიდი გამოხატულებაა. საბოლოო ჯამში, მთელი სურათი იმ ემოციად გარდაიქმნება, რომელსაც შემდგომში ღვინო გვაწვდის.

ღვინო ხომ ენერგიაა, რომელიც სხვადასხვა ემოციების კრებულია.

T: როგორ აღწერთ ორკოლის ღვინის ხასიათს?

ჩვენი ღვინოები, გამომდინარე დასავლური ჯიშებიდან, უფრო განკუთვნილია მსუბუქი, ევროპული, ცოტა მაღალმჟავიანი, ციტრუსოვანი, ტროპიკული ხილის არომატების მქონე, ხალისიანი, ცინცხალი ტიპის ღვინის მოყვარულთათვის.

T: სამომავლო გეგმები:

ჩვენი სურვილია, რომ ძირითადად საექსპორტო ბაზარზე ვიყოთ წარმოდგენილები. ჩეხეთი კი უკვე მეორე ქვეყანაა, სადაც ორკოლი შევიდა. ადგილობრივ ბაზარზე რეალიზაციასა და კონსიგნაციაზე მუშაობა ჩვენი მოცულობის მწარმოებლებისთვის საკმაოდ მტკივნეული და რთული პროცესია.

ვფიქრობ, რომ ქართულ ღვინოს ყოველთვის ნიშური ადგილი ექნება დაკავებული მაღალხარისხიანი ღვინის კატეგორია ჰქვია, რომელიც ალბათ ძირითადად ჰორეკას სექტორში, სხვადასხვა ღვინის რესტორნებსა და ბარებში უნდა იყიდებოდეს.