თამარ ზაკალაშილი ვინტურის შესახებ

The International Master on Wine Tourism Transitions and Innovations (WINTOUR) პრესტიჟული და აღიარებული პროგრამაა ღვინის ტურიზმის სფეროში. საგანმანათლებლო პროგრამა მოიცავს სამი წამყვანი ევროპული უნივერსიტეტის - ტარაგონას, ბორდოს და პორტოს უნივერსიტეტებში სწავლას და აერთიანებს ენოლოგიას, მარკეტინგსა და ღვინის ტურიზმს. პროგრამა შექმნილია იმ ადამიანებისთვის, ვისაც ღვინის ინდუსტრიის შესახებ ღრმა ცოდნის მიღების სურვილი აქვთ.

WINTOUR 2024-ზე საქართველოს წარმომადგენელი თამარ ზაკალაშვილია, რომელიც აგრარული უნივერსიტეტის მევენახეობა-მეღვინეობის ბაკალავრის კურსდამთავრებული და საქართველოს ტექნიკური უნივერსიტეტის სამაგისტრო პროგრამის სტუდენტი იყო.

როგორი იყო თამარის ღვინის გზა და რას მოიცავს ვინტურის სამაგისტრო პროგრამა, ამის შესახებ თბობა თამარ ზაკალაშვილს ესაუბრა.

T: თამარ, როგორ დაიწყო შენი ღვინის გზა?

ღვინის მიმართ სიყვარული ბავშვობიდან დაიწყო. დღემდე მძაფრად მახსოვს, პაპის მიერ დაწურული ღვინის გემო. პროფესიულ მეღვინეობაში ჩართვის მოტივაცია კი ჩემი და თეკლე ზაკალაშვილი იყო. აგრარული უნივერსიტეტის მევენახეობა-მეღვინეობის ბაკალავრზე სწავლის დროს გაცვლითი პროგრამით წავედი გაიზენჰემში. შემდგომ ჩავაბარე მაგისტრატურაზე საქართველოს ტექნიკურ უნივესტიტეტში და ასევე გაცვლითი პროგრამით წავედი სიცილიაზე. ამ გამოცდილებებმა მნიშვნელოვანი როლი ითამაშა ჩემს კარიერულ განვითარებაში და ამ უნივერსიტეტების უსაზღვროდ მადლიერი ვარ.

სწავლის ორივე ეტაპზე აქტიურად ვმუშაობდი, როგორც სომელიედ ასევე ღვინის ქარხანაში: 8000 მოსავალი, მეღვინეობა ვაზიანი, გიუაანი, ალკორიუმი. ამჟამად კი ვიმყოფები ესპანეთში და ვსწავლობ ვინტურის სამაგისტრო პროგრამაზე.

T: რა იყო ინსპირაცია, რომ ვინტურის სამაგისტრო პროგრამაზე გაგეგზავნა აპლიკაცია?

პირველად ამ პროგრამის შესახებ, ბაკალავრზე სწავლის დროს გავიგე. მახსოვს როგორ მოვიხიბლე ამ პროგრამის მრავალფეროვნებით: ღვინო, ღვინის ტურიზმი, მარკეტინგი, 3 ქვეყანა, დაფინანსება - ეს შესაძლებლობა ისეთია, ცხოვრებაში ერთხელ რომ გეძლევა.

განსაკუთრებული ინტერესი ღვინის ტურიზმის მიმართ მრავალფეროვანმა სამუშაო გამოცდილებამ განაპირობა და გადავწყვიტე ჩამებარებინა ამ პროგრამაზე.

T: რა არის ვინტურის პროგრამის განსაკუთრებულობა?

პროგრამის სტრუქტურა ფოკუსირებულია, როგორც მეღვინეობაზე, ისე მარკეტინგზე და ტურიზმზე, რაც სტუდენტებს ფართო ხედვას აძლევს ინდუსტრიაზე. ყოველ ოთხშაბათს კი მთელი ჯგუფი მივდივართ სხვადასხვა მეღვინეობებში, რაც პრაქტიკულ ცოდნას და გამოცდილებას მნიშვნელოვნად ზრდის. ასევე ძალიან დიდი შანსია, რომ მნიშვნელოვანი კონტაქტები შეიძინო.

T: რჩევები მათ, ვისაც ვინტურზე სურს ჩაბარება:

ჩემი აზრით, მნიშვნელოვანია მრავალფეროვანი სამუშაო გამოცდილება და გაცნობიერება, რომ ერთ კონკრეტულ მიმართულებზე ფოკუსირება საკმარი არ არის. ვურჩევ ყურადღებით დააკვირდნენ რა ტიპის სტუდენტებს ირჩევენ და ეცადონ საკუთარი განაცხადი პროგრამის მოთხოვნებს მაქსიმალურად მიუსადაგონ. სამუშაო გამოცდილებასთან ერთად დამატებითი სერტიფიკატები და უცხოენების ცოდნა პრიორიტეტია. იყვნენ აქტიურები და არ შეეშინდეთ გამოწვევების. პარალელურად ბევრი რამის კეთებაა საჭირო, რომ შენ დასახულ მიზნამდე მიხვიდე.

T: სამომავლო გეგმები:

ჩემი დიდი სურვილია, რომ ქართული ღვინის ტურიზმი განვავითარო. ჩემი აზრით, ეს მიმართულება ჯერ კიდევ მნიშვნელოვნად გამოსაყენებელი პოტენციალის მატარებელია.

საქართველოში ღვინის ტურიზმს ძალიან დიდი შანსი აქვს, რომ ცოდნისა და გამოცდილების გამოყენებით ქართული ღვინო უკეთესად წარმოაჩინოს გლობალურ ბაზარზე.