NTA Wines - ღვინო ახალი ღვინის ქვეყნებიდან
- tboba magazine
- Oct 7, 2024
- 1 min read
Updated: Oct 15, 2024
New To Ancient wines ქართველ ღვინის ენთუზიასტებს სთავაზობს ღვინოს ისეთი ქვეყნებიდან როგორიც ჩილე, არგენტინა და სამხრეთ აფრიკაა. ირაკლის იდეა მაშინ დაებადა, როცა საქართველოში ბოთლის ღვინის კულტურა მკვიდრდებოდა.
რა კრიტერიუმებით არჩევენ ღვინოებს და სად შეგიძლიათ დააგემოვნოთ ღვინო ახალი ღვინის ქვეყნებიდან, ამის შესახებ თბობა ირაკლი მგალობლიშვილს ესაუბრა.
T: როგორ დაიბადა NTA Wines იდეა?
იდეა გაჩნდა პანდემიის დროს, როცა შეგვეზღუდა თავისუფლად მოგზაურობა და წვდომა ჩვენს საყვარელ უცხოურ ღვინოებზე. ამ პერიოდში საქართველოში ხარისხიანი ღვინის პოვნა ახალი სამყაროს ქვეყნებიდან თითქმის წარმოუდგენელი იყო.
მიუხედავად შეზღუდვებისა 2 ჯერ მოვახერხე სამხრეთ აფრიკაში მოგზაურობა და ადგილზე ავარჩიე ღვინოები პორტფელისთვის. საქართველოში მთლიანი კონტეინერების გაყიდვა შეუძლებელი იყო, ამიტომ ეს ღვინოები შევთავაზე მეზობელ ქვეყნებსაც, რომლებიც სიამოვნებით დამთანხმდნენ მუშაობაზე. NTA wine ღვინოს ახალი სამყაროდან, საქართველოსთან ერთად ყაზახეთს და უზბეკეთსაც სთავაზობს.
T: როგორ არჩევ ღვინოებს შენი პორტფელისთვის?
ჩვენი ღვინოები წარმოდგენილია არგენტინიდან, ჩილედან და სამხრეთ აფრიკიდან, მათ დაგემოვნებას კი თბილისის ღვინის რესტორან-ბარებში შეძლებთ. მიუხედავად იმისა, რომ ეს ქვეყნები ახალი ღვინის სამყაროს ნაწილად ითვლება, გვაქვს ისეთი ღვინოებიც, რომლებიც ევროპულ სტილთან ძალიან ახლოს დგას.
ღვინოების შერჩევისას მნიშვნელოვანია, რომ ღვინის ხასიათთან ერთად მისი შემქმნელიც გამოირჩეოდეს განსაკუთრებული მიდგომით და საინტერესო ისტორიით. ძირითადად ისეთი მეღვინეობები გვყავს, რომლებიც პირველი თაობის მეღვინეები არიან და თავად ქმნიან ახალ ტრადიციებს.
T: რა გამორჩეული ხასიათი აქვს ახალი ღვინის სამყაროს?
რეალურად ეს ქვეყნები არც ისე ახალია და ხშირად ევროპულ ქვეყანაზე ძველიც კი გამოდის.
ჩემი აზრით არატრადიციული ღვინის ქვეყნები მალე უფრო პოპულარული გახდებიან, ვიდრე ტრადიციული. ამის ნიშნები უკვე არსებობს - ბრიტანული ცქრიალა ღვინოები ძალიან პოპულარული ხდება და შვედეთში აკეთებენ ღვინოს.
T: რა აკლია ქართულ მეღვინეობას?
ცოდნა - კიდევ ბევრი გვაქვს სასწავლი. ასევე გვაქვს უფრო მეტი რესურსი, განსაკუთრებით მევენახეობაში. სხვა ქვეყნების ვენახებს, რომ ვადარებ, გული მწყდება, მგონია, რომ უკეთესის გაკეთება შეგვიძლია. რეალურად, რამდენიმე მეღვინეობას შეუძლია შეცვალოს მთლიანად ინდუსტრია და გახდეს ლოკომოტივი.
Comments