1 დეკემბერს, დღის 12:00-19:00-მდე მთაწმინდის პარკში, კლუბ „ანდერვილში“, გაიმართება 2024 წლის ერთ-ერთი ყველაზე გამორჩეული ღონისძიება - ცქრიალა ღვინის ფესტივალი. ღონისძიება ღვინის კლუბის ინიციატივით 2022 წლიდან იმართება და ღვინის ეროვნული სააგენტოს მხარდაჭერით ხორციელდება. მთელი დღის განმავლობაში კი ღონისძიება უმასპინძლებს ღვინის მოყვარულებს, სომელიეებსა და პროფესიონალებს.

„ფესტივალზე მოსულ სტუმრებს დახვდებათ ცქრიალა ღვინოები საქართველოს თითქმის ყველა კუთხიდან - წელს უკვე 37 ღვინის მარანი იქნება წარმოდგენილი. იქნება კარგი მუსიკა, სადღესასწაულო ატმოსფერო და ბევრი ცქრიალა მომენტი“ - ნათია გაჩეჩილაძე.

ფესტივალის გამორჩეული ხიბლი მრავალფეროვან ცქრიალებში და მათ ეტიკეტებშია. სტუმრებს შესაძლებლობა ექნებათ არა მხოლოდ გასინჯონ უახლესი პეტნატები და ცქრიალა ღვინოები, არამედ უშუალოდ გაესაუბრონ მეღვინეებს და მიიღონ დამატებითი ინფორმაცია იმ ღვინოების შესახებ, რომლებიც მათ მოეწონებათ.